MAIOS 2019

O vindeiro día 30 de abril, celebramos no colexio a festa dos Maios e o 1 de maio o Concello convoca o concurso anual dos Maios, que podedes ver no cartel de máis abaixo.
Nesta ocasión faremos un maio 1º,2º e 3º de Ed. Primaria e interpretaremos unha fermosa cantiga de Luis Emilio Batallán que fixo para o marabilloso poema de Manuel Curros Enríquez "O Maio" do seu libro "Aires da Miña Terra"
Aquí vos deixo a letra e un vídeo da canción, para que vaiades practicando. Tamén podedes velo todos estes días na columna da esquerda
Ánimo rapaciñ@s!!!

O MAIO

Aí vén o maio

de frores cuberto ...

Puxéronse á porta

cantándome os nenos;

i os puchos furados

pra min estendendo,

pedíronme crocas

dos meus castiñeiros.

Pasai, rapaciños,

calados e quedos;

que o que é polo de hoxe

que darvos non teño.

Eu sonvos o probe

do pobo galego:

pra min non hai maio,

pra min sempre é inverno! ...

Cando eu me atopare

de donos liberto

i o pan non me quiten

trabucos e préstemos,

e como os do abade

frorezan meus eidos,

chegado habrá entonces

o maio que eu quero ...

Queredes castañas

dos meus castiñeiros? ...

Cantádeme un maio

sin bruxas nin demos;

un maio sin segas,

usuras nin preitos,

sin quintas, nin portas,

nin foros, nin cregos.

Poema: Manuel Curros Enríquez ("Aires da miña terra")

Música: Luis Emilio Batallán

COÑECEMOS A ENFERMIDADE CELÍACA

O xoves 4 de abril coñecimos un pouco mellor en que consiste a enfermidade celíaca. 

Grazas a Dámaris e a vaca Paca aprendimos en que consiste esta enfermidade, cales son os síntomas e como deben actuar as persoas que a padecen para que o gluten non lles faga dano no organismo.

Tras asistir a actividade todos e todas agora xa coñecemos como debemos actuar se comemos cunha persoa celíaca, cales son os alimentos que poden comer sen preocupación, como os lácteos ou a froita, entre outros, e como identificar cando vamos a mercar que productos están libres de gluten e cales non. 

Acordádevos do dano que pode facer un só gran de gluten a unha persoa celíaca!